Halyk Finance цифрлық қаржы активтеріне жол ашады: инвесторлар мен нарық үшін жаңа мүмкіндіктер

2026 жылғы 25 тамызда Қазақстан қор биржасының (KASE) Басқармасы Halyk Finance-ті цифрлық қаржы активтері платформасының және цифрлық активтер сауда платформасының қатысушысы ретінде мақұлдады. Компания мұндай мәртебеге ие болған алғашқы ұйым атанып, Қазақстандағы цифрлық инвестициялық өнімдерді дамытудың жаңа кезеңіне жол ашты.

Halyk Finance үшін бұл – цифрлық қаржы активтерінің өзіндік желісін қалыптастыру жолындағы алғашқы практикалық қадам. Бұл тек мәмілелер жасаудың жаңа тәсілі ғана емес, дәстүрлі активтерді цифрлық форматта шығаруға, есепке алуға және айналымға енгізуге мүмкіндік беретін қаржы нарығы моделіне біртіндеп көшу туралы сөз болып отыр.

Әлемдік тәжірибеде токенизация эксперименттік кезеңнен шығып келеді. Ірі қаржы орталықтары оны облигациялар мен басқа да қаржы құралдарын шығару үшін пайдаланады. Бұл ретте реттелетін инфрақұрылым, меншік құқықтарын есепке алу және инвесторларды қорғау тетіктері сақталады.

«Цифрлық қаржы активтері платформасының қатысушысы мәртебесін алу – Halyk Finance үшін маңызды қадам. Біздің міндетіміз – жаңа технологияны жай ғана пайдалану емес, дәстүрлі қаржы нарығының артықшылықтарын цифрлық инфрақұрылымның мүмкіндіктерімен ұштастыратын түсінікті әрі сұранысқа ие инвестициялық өнімдерді жасау. Біз қаржылық және нақты активтерді токенизациялауда, инвестициялардың қолжетімділігін арттыруда және капитал тартудың жаңа нысандарын дамытуда зор әлеует көріп отырмыз», – деп атап өтті Halyk Finance Басқарма төрағасы Фархад Охонов.

Әлемдік тәжірибе цифрлық активтердің басты артықшылығы дәстүрлі қаржы құралдарынан бас тартуда емес, оларды шығару, айналымға енгізу және олар бойынша есеп айырысу үшін неғұрлым икемді инфрақұрылым қалыптастыруда екенін көрсетеді.

Клиент үшін бұл инвестициялау және есеп айырысу тәсілдерінің кең таңдауын білдіруі мүмкін. Ұзақ мерзімді перспективада цифрлық инфрақұрылым аралық операциялар санын қысқартуға, есеп айырысуды жеделдетуге және активтерді неғұрлым икемді басқаруға ықпал ете алады.

Әлемдік тәжірибе токенизацияның облигациялар, қорлар, ақша нарығы құралдары мен жеке активтер үшін, сондай-ақ қамтамасыз ету мен өтімділікті неғұрлым тиімді басқару үшін әлеуеті жоғары екенін көрсетеді.

Сонымен қатар токеннің өзі инвестицияны тәуекелсіз етпейтінін түсіну маңызды. Экономикалық нәтиже бұрынғыдай жобаның сапасына, оның қаржылық моделіне, нарықтағы жағдайға және цифрлық активті шығару талаптарына байланысты. Сондықтан нарықтың дамуы ақпаратты ашудың ашықтығымен және токенмен бекітілген құқықтардың инвесторға түсінікті сипаттамасымен қатар жүруі тиіс.

«Жаңа мәртебеге ие болу Halyk Finance үшін цифрлық инвестициялық өнімдердің неғұрлым кең экожүйесін кезең-кезеңімен дамытуға негіз қалайды. Біз дәл осы бағытта қозғалуды – цифрлық өнімдер желісін біртіндеп кеңейтуді және технология клиенттер үшін нақты құндылық жасай алатын салаларда жаңа мүмкіндіктерді енгізуді көздеп отырмыз. Біздің мақсатымыз – үздік халықаралық тәжірибелерді пайдалана отырып және сенімділік пен клиенттердің мүдделерін қорғаудың жоғары стандарттарын сақтай отырып, Қазақстанда осы нарықты қалыптастыратын компаниялардың қатарында болу», – деп қорытындылады Фархад Охонов.

***

«Halyk Finance» АҚ – бағалы қағаздар нарығында брокерлік қызмет көрсету, активтерді басқару және инвестициялық банкинг сегменттерінде жетекші орын алатын Halyk Bank-тің еншілес ұйымы. Компания қаржылық консалтинг пен андеррайтингті, корпоративтік қаржыландыру қызметтерін, брокерлік қызмет көрсету мен бағалы қағаздар саудасын, KASE және AIX сауда алаңдарындағы маркет-мейкер қызметтерін, инвестициялық портфельді басқаруды, сондай-ақ тұрақты талдамалық қызметтерді қоса алғанда, инвестициялық-банктік қызметтердің толық кешенін ұсынады. Компания – халықаралық Fitch Ratings рейтингтік агенттігінен инвестициялық деңгейдегі халықаралық кредиттік рейтингті («BBB-») алған Қазақстандағы алғашқы және жалғыз брокер-дилер.